الخو والعدو من لوعتك نشكيلا

انروق وقت واتعاود عليك الهيله الخو والعدو من لوعتك نشكيله
مرات نعفى عنك
وانتي السبب وانقول ماهو منك
عدابي ولكن وين يرشق جنك
اللي مايجيني ماالعرب نمشيله
امعاي كيف شوهتي غلاي بظنك
اللي مانشدني نجبده نحكيله
ويشكن عروق القلب كيف عطنك
مفاتيح باب القلب خشيتيله
ورده جميلة زاهية عرفنك
ظهرتي حنش مابين يوم وليله
زمان حلم كنتي سمح مااحسبنك
اتجي اليوم جثامة منام ثقيله
لله واصل يافتاه كرهنك
نترك محاور داك باي وسيله
مابن ايكفن من نهار خطنك
علي الجوف مازالن اتقول عزيله
وعندي افكار العقل ماينسنك
انسهي ولا الغفلة عليك طويله
عليك مايغيبن وقت وايجيبنك
شهير دفترك دكرة عداب دليله
وانقول من جديد آكيد مايطرنك
ولا خاطري يشكي بما طاريله
عامل فنكسات الحياة نلقنك
وشور النجاح اتعارضي افسبيله
اعفيهن اعفيهن والسماح عطنك
الله والنبي بالك طلبت القيله
من عيبك ونارك كان يصلنك
الله والنبي ديري امعاهن حيله
ونادي عليهن غير بيش ايجنك
ونا انطيش طيشة بل من سرويله
مانلتفت عالساق هارب منك
ولاعد ايجيك العقل لا تمشيله
عليا مكاتيب الشقا شقنك
وعيبك وعيب الوقت فيهن ميله
انروق وقت واتعاود عليك الهيله جميع مااخلق من لوعتك نشكيله
مرات نبقى قاسي
وهايم مع مر الزمان وناسي
ولاك في حديثي ولاك في مجلاسي
ولاك في منام الليل لك تخييله
امغير وين تخطر نشفتك في راسي
وحملك ايبات ثقيل واعر شيله
نعطي عليك اسبوع صابح ماسي
نخطب خطابي وين مايرعيله
ثقيل السمع ينشد خطاب سياسي
والا اشيوخ ايحاضرو افقبيله
واللي كيفنا فالصوب دوم ايواسي
ايهاون اعطابه وقت وايوليله
واللي الحياه ماقاسها بمقياسي
ولا اللي جرالي انشالله يجريله
يحسابني مدمن اكيوف كراسي
حارق اوراقي فوق راس ارقيله
بالعكس لو يعرف مناسل ناسي
راني امربا بين بيت وعيله
خطرها علي اسباب خفة باسي
امرار خونتك يم العيون دبيله
انروق وقت واتعاود عليك الهيله جميع مااخلق من لوعتك نشكيله
يخطر علي عدابي
وين تخطري يم لهدوب مصابي
ونندم علي ضيعة ايام شبابي
الحلوة وراء رحلة عداب طويله
يااللي رجيتك كان ماتحسابي
ونا ميسك ياسيين يم نبيله
ياس عارفه صادر بحكم اغيابي
وشالك علي نعش الفراق قتيله
وياس دافنه منك خيالك غابي
ادنوب رقبتك درتي وراك اعويله
انروق وقت واتعاود عليك الهيله الخو والعدو من لوعتك نشكيله

الله يجزيك الخير وسلمت أناملك الذهبية التي خطت هذه الأبيات
وشبكة البركولي تستحق هذا العطاء
فهي شبكة محترمة ¤ وفقك الله

الله يعطيك العافية

مشكورين وبارك الله فيك

مشكورين جميعا