مكتبة الغناوي والشتاوي

* لنبدأ ب( الحلم )
حلمت يا عزيز منام ... تمنيته الليل وما كمل
راقد وجاك النوم ... كذاب ما غلانا شاغلك
اتقول في الغطا مكتوب ... يخطر عزيز ساعات نومها
خيالات ياس عزيز ... للعين وين نامت ايجن
سريب ناس كانوا صوب ... البارح منامي جابهم
معاه النوم غير خيال ... العقل يا بعيدين عندكم

* ( الذكرى والنسيان )
مرهون يالعين انسيه ... ديري عزا وين واصبري
بلا رقرقة يا عين ... انسي عزيز ياساته مضن
يكساها ضباب تحوس ... العين وين لأوهامك تجي
ننهى العين على ذكراه ... تقول نبيه لين ننظره
بكيت والبكا ماجاب ... ننساهم والله غالب علي
متورخين في الخاطر ... اعزاز ما نسيناه صوبهم

* ( مابين ارادة وعاطفة )
واخدين مافي العقل ... سواء بعاد ولا يقربوا
ترك غلاه عاش بلاه ... العقل كيف راعاك خاينة ؟
سبحان اللي هانوا ... واشقى العقل بأولاف غيرهم
بطى العقل يرجى فيك ... تغيب ليش يا مولى الدوا
العقل يا بعاد الدار ... يمسى معاي ويبات عندكم

* ( بكاء )
العين هدبها مبروم ... على عزيز يا ما باكية
ماعاد فيهن هدب ... لنظار م البكا يا غالية
خلاني عزيز يتيم ... بكاي ليل والليل ما كمل
بعد العيب جا منك ... يا عزيز مشكاهن لمن ؟
دموعي على لولاف ... سقطن في صفاء دارن حفر
ننهاهن يديرن عزم ... يمساهن الليل ويذرفن

* (الفراق )
فراق العزيز صعيب ... والصبر في غيابه كادني
ادموعي على لولاف ... نزيل غيم ريحة خامدة

* ( الارياف , الشوق )
امرايف يا عزيز عليك العقل ... حتى وانت يالاه موعره
اريافي ونار غلاك ... يا عزيز انا مانطيقهن
فراق العزيز عذاب ... وعين حزينة مرايفة
العقل مانسيهم يوم ... امرايف على طول ياسهم
مابك مرض يا عين ... على عزيز غير امرايفة
امرايف رياف الطير ... اللي في القفص حابسينه

* ( الجروح )
جروح كامدات الروح..
كاسرات العظم..
طارشات الوذن ..
سالات القلب ..
عاميات العين ..
ساحنات الكبد ..
طبيب ما على داهن ايجي .
جروحات عزيز كبار ... وساع والدوا انا منين لي
خايف العقل يجول ... يلقى الجرح ويغيب الدوا

* ( الغلا , الحب )
لا حرام ولا مسروق ... ليش في غلانا تجحدوا
بسيف الغلا مضروب ... القلب لين هادي حالته
شدي عزايمك يا عين ... يفنى العمر لا بال الغلا
اللي ما تردى مات ... اصحاب الغلا راهو الكل
بلاه مانعيش انموت ... غلاك يا علم نفس وقوت
ان كان الغلا قتال ... الدايم الله يا ارواحنا

* ( الحسد )
اللي حسدك صوب عزيز ... يعيش لا نبا لا عافية
التموا في مقاعده حساد ... عزيز مانلومه ع الخطا
عليك ميعدوا حساد ... ضروك في غلا كان نافعك
عزيز وين صار خطاه ... حساده خدوا غايتهم

* ( الخاطر )
يا عزيز وين تغيب ... ما يجيبلي خير خاطري
الخاطر مامعاه رفيق ... الا غلاك ديما يا علم
سريب غيرهم ما جاب ... الخاطر غواليه القدم
قسامي بلا غيات ... بالخاطر الله لا يجيبهن

* ( القدر , الاحترام , التقدير )
القدر هو رديع الصوب ... ان غابن قوانينه اعدم
ماهن خسارة فيك ... لقدار يا عزيز تقيمهن
في زمان قل القدر ... لقى لتراك خيرله

* ( الخطا )
مازال واجعك يا عين ... خطاهم اللي ماله سبب
خطاي من خطاك معاي ... سبق خطاك كافيته بالخطا
خطا عزيز كيد كبير ... معاه خاطري ناض وقعد
لا عزيز داير خير ... ولا خطاه لا قيله جهد
ليش يا عزيز ادير ... الصوب وانت عابي ع الخطا

* ( الصبر )
الصبر شين وزين ... عليه كان يالعين تقدري
هاك صبر داوي داك ... احسن عزاك في صاحب الغلا
الدمع ما يجيب عزيز ... الصبر خير واولى م البكا
اصبر تنال صوب عزيز ... اموالة الغلا طولة رجا

مشكور اخي ايراهيم علي ردك الراقي

شكرا, تقبل مروري

ياريت الي بيدخل لي موضوع متل هل الموضوعي مايشكر ويطلع هو موضوع لشتاوي يعني لازم يعضي شتاوه

مشكوره اختي

أكيد مشكور وأكيد مش طالعة لحد مااضيف شوي من عندي واللي عندي نفس اللي عندك تقريبا

// الفراق \\
ـ فراق العزيز عذاب وعيني حزينة مرايفة.
ـ ما زال واجعك يا عين فرقاهم اللي ما له سبب؟.
ـ مرار كل شيءعانيت إلا فراق لولاف كادني.
ـ الغيبة صعيبة على لولاف الله لا يدومها.
ـ بعد فراق عزيز تبقى طويل يا ليل ما أوحشك!.
ـ تباعد عليك عزيز حتى نباه ما عاد واصلك .
---------------------------------------
// الطيف والحلم \\
ـ احلمت يا عزيز منام تمنيته الليل ما كمل.
ـ العين قسمها من النوم دقيقة وفيها تخطروا.
ـ لو كان يا منام الليل تبقى رسيل بيني وبينهم؟.
ـ معاي النوم غير خيال العقل يا بعيدين عندكم.
---------------------------------------
// الغلا \\
ـ نحسابه مرض يا عين غلا عزيز داويته بالدواء.
ـ شدّي عزايمك يا عين يفنى العمر يا بال الغلا.
ـ حسبت خاطري عوام سهيت شالني سيل الغلا.
ـ على غلاك لين انموت العين يا علم بات رايها.
ـ حال غايتي في صوب مع جديد ما ضاق الغلا.
غلاهم يجي توكات معاه يا عين لين تدهشي.
---------------------------------------
// الرياف\\
ـ ريافي ونار غلاك يا عزيز نا مانطيقهن.
ـ يسيلن وهوموجود على عزيز يا بال رايفن.
ـ عطشان ذيبله مرجاك العقل ما روي لين قابلك.
ريتوا حبال العين تبكي اتقول هيا شورهم.
ما بك مرض يا عين امغير على عزيز مرايفة.
---------------------------------------
// الموح \\
ـ تباعد وحازه موح عزيز يا العين كان يشغلك.
ـ ازعما وين صار الموح مدعي غلاك ما زال جابده.
---------------------------------------
// الرجاء\\
ـ من طول يا عزيز رجاك الخاطر امراضه استاصلن.
ـ الخاطر كان فيه نصيب ايجيبه رجاء طول عمرنا.
ـ راجيت والرجاء ما جاب ننساهم الله غالب عليّ.
ـ العين ع الظلال اتوب إن طالت اللي في بالها.

ومشـــــــــــــــــــــكور

يسلمو لي تفاعليك في المكتبه